الثلاثاء، 5 مايو 2009

مشاعرنا ليست مشاع

جميل جدا ان الانسان يتكلم ويكتب بصدق عن الاشياء ال بيحسها
لكن مش كل حاجة الانسان بيحسها ينفع يتكلم او يكتب عنها
لاحظت كتير من المدونين بيكتبوا عن مشاعرهم تجاه شريك حياتهم
وتخيلاتهم لحياتهم مع الشخص دا
اوحتى بيحكو مواقف وتجارب مروا بيها
هى فعلا مشاعر جميلة واى انسان بيعيشها
لكن.....
بجد المشاعر دى مش مشاع
مش كل الناس تعرف طريقة تفكيرك ف الشخص دا
خاصة انه مفيش داعى او فايدة من الكلام عن الموضوع دا
بل بالعكس دا ليه اضرار
بتحرك مشاعر القارىء..
انت كده بتسبب فتنة

كلامك ممكن يأثر ف شخص معين
وتكون سبب ف تعلق الشخص دا بيك من خلال كلامك
حتى لو كان تعلق وهمى..
تبقى برضه سببت فتنة

المشاعر دى ملك الشخص ال يستحقها بس
هو ال من حقه يعيشها معاك
وهو ال من حقه يعرفها

او التجربة ال انت حكيتها كانت بينك وبين حد معين
مفيش داعى اننا نحكيها

عارفة ان كلامى مرفوض بالنسبة لكم
لكن هى وجهة نظر ودعوة فردية منى
ارجو تتقبلوها..

وتكون مشاعركم مش مشاع

الاثنين، 20 أبريل 2009

نفسى ارجع

السلام عليكم ورحمة الله وبركاته
فعلا المدونة وحشتنى
وكل مدوناتكم الجميلة وحشتنى اكتر
نفسى ارجع تانى اكتب
واتابع المدونات واعلق
لكن فعلا حاسة انى مغيبة
مش عندى قدرة ع التركيز ف اى شىء
حتى المذاكرة.....
ادعولى ارجع تانى
ارجع ليومى ال كنت متعودة اعيشه
ارجع لاصحابى ال حاسة انى بعدت عنهم كتير
ارجع لتفوقى ال اتحول لاستهتار
ارجع لنفسى ال بجد حاسة انها تايهة منى
ارجع لقرآنى ال كنت حفظاه عن ظهر قلب وحاسة انى فعلا نسيته
ارجع لصلاتى ال فقدت كتير من خشوعى فيها
فعلا احساس سىء جدا اول مرة اشعر بيه
لكن الحمد لله ع كل شىء
ارجوكم ادعولى كتير
......
......

الأربعاء، 4 مارس 2009

أطفال ولكن

خلاص يا جماعة،،

الموضوع مابقاش يتسكت عليه،،

شباب وبنات أخلاقهم منعدمة وقلنا ماشى،،

ناس عدوا الخمسين سنة ومش ناويين يتوبوا هما احرار،،

لكن أطفال أقل من 6 سنوات يبقى فى حاجة غلط بجد،،

أنا نفسى أتعامل مع طفل يحسسنى بطفولته وبرائته

اكلمه من غير ما يرد عليا الكلمة عشر كلمات

أنا فاكرة اننا كان كل اهتمامنا باللعب وبس

دلوقت الأطفال بقى ليهم اهتمامات تانية خالص

هقولكم أمثلة...

كنت عند واحدة صاحبتى ودخلت غرفة اختها الصغيرة عندها 6 سنوات

لقيت جدران الغرفة كلها صور لمهند التركى

حاولت اقنعها اننا مينفعش نحب الناس دى

لكن ولا حياة لمن تنادى،،

حاجة تانية...

فتحت شنطة الحضانة بتاع بنت خالتى عندها 4 سنوات

لقيتها شايلة فيها علبة الماكياج بتاع مامتها

مش عارفة الصراحة لما تدخل الجامعة هتشيل ايه فى شنطتها،،

حاجة تالتة...

حتى أختى ،،أختى اللى متربية على ايدى

لقيتها ف يوم راجعة من الحضانة وبتقولى حاجة غريبة جدا

صاحبها ف الحضانة بيقولها تتجوزينى يا ايمان!!!

وطبعا يا جماعة بما ان اختى بنت محترمة وعاقلة ردت عليه رد مقنع جدا

ازاى هنتجوز وانت مش عندك بدلة وأنا مش عندى فستان أبيض؟؟

طبعا أفحمته ومقدرش يرد،،


بجد انا مش عارفة ايه السبب ف اللى بيحصل دا

لازم نتصرف قبل ما فئة الأطفال تختفى من مجتمعنا،،


الثلاثاء، 24 فبراير 2009

توبة بجد



شىء جميل اننا نتوب عن ذنب،،
وتكون كل غايتنا من التوبة هى ارضاء الله،،
رضاه وبس من غير اى مصلحة دنيوية،،

شىءجميل اننا نحس بعظم الذنب،،
مهما كان فى عيون الناس صغير،،

الأجمل بجد اننا نلمس بايدينا حلاوة الطاعة،،
وان سعادة الدنيا فعلا مرتبطة بسعادة الآخرة،،

الكلام دا كله مريت بيه من سنتين تقريبا،انا كنت عندى موضوع الغش فى الامتحانات شىء عادى جدا ،مع انى مش بغش من حد ولله الحمد،بس كنت بغشش زمايلى،،
لكن وانا فى تانية ثانوى(ازهرى يعنى مش شهادة) قررت انى لازم ابطل موضوع الغش دا ،لانه حرام حتى لو كان سبب فى زعل حد منى،،

وفعلا اخلصت نيتى ومشيت عالخطة طول الامتحانات،،
يوم النتيجة حسيت ببركة الموضوع دا ،طلعت الاولى معرفش ازاى ؟؟
كل سنة كنت ببقى التانية بسبب مادة الرسم (بجد رسمى وحش جدا)
ومشيت على نفس الخطة ف سنة تالتة والحمد لله طلعت برضه الأولى وبمجموع كبيير جدا،،

يا ريت كل واحد فينا يدور فى ذنوبه مهما كانت صغيرة ممكن تكون هى السبب فى منع الخير عنه،،،

الخميس، 19 فبراير 2009

طوبى للغرباء


السلام عليكم
طوبى للغرباء
فعلا حسيت بالكلمة دى جدا من كام يوم
خرجت أنا وبعض الأخوات وروحنا حديقة الأزهر
المكان فعلا رائع سبحان الخالق
لكن كنا فعلا غرباء فيه
احنا بس اللى كنا جماعة خارجة قصدها طاعة
أو حتى ترويح عن النفس بأسلوب برىء ومحترم
لكن باقى الزوار فكانوا جميعا(COUPLES)
وكانت الطامة الكبرى وقت الصلاة
حيث أن الحديقة الطويلة العريضة ليس بها مسجد
ولم أر سوى ثلاثة رجال وقفوا يصلون وحدهم
أنا فعلا حزينة على بلدنا وشبابنا
لكن صدقت يا رسول الله
طوبى للغرباء


الجمعة، 13 فبراير 2009

يا أولى القبلتين


أسروك مسجدى وحرمونى منك
دنسوك وعاثوا فيك فسادا
أحرقوك وأشعلوا قلوبنا نارا وحسرة
ومازال الخائنون يوالون أعداءك
وبل وينصرونهم على أبناء وطنك
لقد لطخوا أيديهم بدماء شهدائك
وكتبوا بها معاهدات الاستسلام
نشهدك بأننا نبرأمنهم
فكن لنا شهيدا يوم القيامة





صور للمسجد الأقصى من الداخل

اللهم ارزقنا صلاة فى رحابه
وشهادة على أبوابه